Azərbaycan Respublikasının Mərkəzi Bankı yanında Maliyyə Monitorinqi Xidmətinin direktorunun 2009-cu il 25 dekabr tarixli əmri ilə təsdiq edilmişdir AZƏRBAYCAN RESPUBLİKASININ MƏRKƏZİ BANKI YANINDA MALİYYƏ MONİTORİNQİ XİDMƏTİNİN HÜQUQ VƏ METODOLOGIYA ŞÖBƏSİ HAQQINDA ƏSASNAMƏ Bakı 2009
I. ÜMUMİ MÜDDƏALAR 1. Azərbaycan Respublikasının Mərkəzi Bankı yanında Maliyyə Monitorinqi Xidmətinin Hüquq və metodologiya şöbəsi Azərbaycan Respublikasının Mərkəzi Bankı sədrinin 2009-cu il 30 iyul tarixli 30mb nömrəli əmrinə əsasən yaradılmışdır. 2. Hüquq və metodologiya şöbəsi Azərbaycan Respublikasının Mərkəzi Bankı yanında Maliyyə Monitorinqi Xidmətinin (bundan sonra Maliyyə Monitorinqi Xidməti) müstəqil struktur bölməsidir. 3. Hüquq və metodologiya şöbəsi öz fəaliyyətində Azərbaycan Respublikasının Konstitusiyasını, Azərbaycan Respublikasının tərəfdar çıxdığı beynəlxalq müqavilələri, «Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında» Azərbaycan Respublikasının Qanununu, «Azərbaycan Respublikasının Mərkəzi Bankı yanında Maliyyə Monitorinqi Xidməti haqqında Əsasnamə»ni və digər normativ hüquqi aktları, Maliyyə Monitorinqi Xidməti üzrə əmrləri, sərəncamları və bu Əsasnaməni rəhbər tutur. 4. Hüquq və metodologiya şöbəsi Maliyyə Monitorinqi Xidmətinin fəaliyyət istiqamətləri üzrə vəzifələrini yerinə yetirərkən və hüquqlarını həyata keçirərkən Maliyyə Monitorinqi Xidmətinin digər struktur bölmələri ilə qarşılıqlı əlaqədə fəaliyyət göstərir. II. HÜQUQ VƏ METODOLOGİYA ŞÖBƏSİNİN FƏALİYYƏTİNİN MƏQSƏDİ 5. Hüquq və metodologiya şöbəsinin fəaliyyətinin əsas məqsədi Maliyyə Monitorinqi Xidmətinin fəaliyyətinin hüquqi təminatından ibarətdir. III. HÜQUQ VƏ METODOLOGİYA ŞÖBƏSİNİN VƏZİFƏLƏRİ 6. Hüquq və metodologiya şöbəsi bu Əsasnaməyə uyğun olaraq aşağıdakı vəzifələri həyata keçirir: 6.1. Maliyyə Monitorinqi Xidmətində hüquq işinin həyata keçirilməsini və onun fəaliyyətində qanunçuluğun möhkəmləndirilməsini təmin etmək;
6.2. cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində (bundan sonra müvafiq sahədə) Azərbaycan Respublikası qanunvericiliyinin tətbiqi təcrübəsini ümumiləşdirmək; 6.3. öz səlahiyyətləri daxilində cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizənin vəziyyətini öyrənmək və təhlil etmək, bununla bağlı təkliflər hazırlamaq; 6.4. ölkədaxili və beynəlxalq təcrübə nəzərə alınmaqla müvafiq sahədə qanunvericiliyin təkmilləşdirilməsi məqsədilə normativ hüquqi və normativ xarakterli aktların layihələrini hazırlamaq, Maliyyə Monitorinqi Xidmətinin digər struktur bölmələri tərəfindən hazırlanmış normativ xarakterli aktların layihələri üzrə hüquqi rəylər vermək; 6.5. qüvvədə olan normativ hüquqi və normativ xarakterli aktların müvafiq sahədə yeni qəbul olunmuş qanunvericilik aktlarına uyğunlaşdırılması barədə təkliflər hazırlamaq; 6.6. Maliyyə Monitorinqi Xidmətinə daxil olan normativ hüquqi və normativ xarakterli aktların layihələrinə dair müstəqil və ya Maliyyə Monitorinqi Xidmətinin digər struktur bölmələri ilə birgə rəy hazırlamaq; 6.7. Maliyyə Monitorinqi Xidmətinin fəaliyyət strategiyasına dair tədbirlər planlarının hazırlanmasında və icrasında iştirak etmək; 6.8. Hüquq və metodologiya şöbəsinin strateji və taktiki fəaliyyət planlarının layihələrini hazırlamaq və təsdiq olunmaq üçün Maliyyə Monitorinqi Xidmətinin rəhbərliyinə təqdim etmək; 6.9. müvafiq sahədə beynəlxalq müqavilə layihələrinin hazırlanmasında, onların Azərbaycan Respublikasının qanunvericiliyinə uyğunluğu, hüquqi qüvvəsi və yerinə yetirilməsi məsələləri üzrə rəy verilməsində iştirak etmək; 6.10. müvafiq sahədə Azərbaycan Respublikasının tərəfdar çıxdığı beynəlxalq müqavilələrdən irəli gələn öhdəliklərin icrası ilə bağlı Azərbaycan Respublikası tərəfindən beynəlxalq təşkilatlara təqdim olunan dövri hesabatları tərtib etmək; 6.11. Maliyyə Monitorinqi Xidmətinin Beynəlxalq əməkdaşlıq şöbəsi ilə birgə beynəlxalq təşkilatların Azərbaycan Respublikası üzrə hesabatlarına,
tövsiyələrinə, sorğularına və digər sənədlərinə aidiyyəti üzrə vaxtında reaksiya verilməsi üçün zəruri tədbirlər görmək; 6.12. müvafiq orqanlara təqdim olunan cinayət xarakterli faktları əks etdirən materialların mövcud qanunvericiliyin tələblərinə uyğun olaraq sənədləşdirilməsini yoxlamaq; 6.13. cinayət yolu ilə əldə edilmiş pul vəsaitlərinin və ya digər əmlakın leqallaşdırılmasında, terrorçuluğun maliyyələşdirilməsində, transmilli mütəşəkkil cinayətkarlığı, habelə silahlı separatizmi, ekstremizmi və muzdluluğu dəstəkləməsində, narkotik vasitələrin və ya psixotrop maddələrin qanunsuz dövriyyəsində iştirakı ehtimal olunan, maliyyə əməliyyatlarının aparılması zamanı eyniləşdirmə məlumatlarının açıqlanması tələb olunmayan dövlətlərin (ərazilərin) siyahısının müəyyən edilməsində iştirak etmək; 6.14. Maliyyə Monitorinqi Xidmətinin hüquqlarını və qanuni maraqlarını məhkəmədə və digər şəxslərlə münasibətlərdə müdafiə etmək; 6.15. öz səlahiyyətləri daxilində müvafiq sahədə monitorinq iştirakçılarının, monitorinqdə iştirak edən digər şəxslərin, nəzarət və digər dövlət orqanlarının fəaliyyətinin əlaqələndirilməsində iştirak etmək, onlardan daxil olan müraciətlərə baxmaq; 6.16. hüquqi və fiziki şəxslərin müvafiq sahədə qanunvericiliklə bağlı ərizə və müraciətlərinə baxmaq və qanunvericiliyə müvafiq cavablar hazırlamaq; 6.17. Maliyyə Monitorinqi Xidmətinin rəhbərliyinə imzalamaq üçün təqdim edilmiş əmr, sərəncam, təlimat və digər normativ xarakterli sənədlərin layihələrinin, habelə göndərilən məktubların qanunauyğunluğuna baxmaq və müvafiq rəy və ya viza vermək; 6.18. Maliyyə Monitorinqi Xidmətinin fəaliyyətinə dair dövrü və statistik hesabatları tərtib etmək; 6.19. Maliyyə Monitorinqi Xidmətinin rəhbərliyi üçün qüvvədə olan qanunvericilik, xarici dövlətlərin qanunvericiliyi və beynəlxalq standartlar üzrə arayış xarakterli materiallar hazırlamaq; 6.20. qanunvericiliyə uyğun olaraq bank və ya kommersiya sirrinin, habelə xidməti məlumatların qorunmasını təmin etmək;
6.21. Maliyyə Monitorinqi Xidmətinin bağladığı təsərrüfat və digər mülki-hüquqi xarakterli müqavilələrin hazırlanmasında iştirak etmək və onların hüquqi ekspertizasını həyata keçirmək; 6.22. Maliyyə Monitorinqi Xidmətinin digər struktur bölmələrinə hüquqi məsələlərdə əməli və metodiki köməklik göstərmək, rəhbərlik və əməkdaşlara müvafiq sahədə yeni qəbul olunmuş qanunvericilik, qanunvericiliyə edilmiş dəyişikliklər və əlavələr barədə məlumat vermək; 6.23. Maliyyə Monitorinqi Xidmətinin normativ xarakterli aktlarının və daxili normativ sənədlərinin reyestrini aparmaq və onların əsillərini saxlamaq; 6.24. Hüquq və metodologiya şöbəsinin əməkdaşlarının peşəkarlıq səviyyəsinin artırılması üçün müvafiq tədbirləri həyata keçirmək, onların zəruri təhsil və treninq proqramlarında iştirakını təmin etmək, Maliyyə Monitorinqi Xidmətinin digər struktur bölmələri ilə birgə müvafiq sahədə konfransların, seminarların, forumların, treninqlərin və digər tədbirlərin keçirilməsini təşkil etmək; 6.25. Maliyyə Monitorinqi Xidmətinin növbəti təqvim ili üçün vahid xərclər smetası layihəsinin tərtib olunması məqsədilə, Mühasibat uçotu qrupunun müəyyən etdiyi formaya uyğun olaraq Hüquq və metodologiya şöbəsinin strateji və taktiki hədəflərinin qiymətləndirilməsi əsasında və bu göstəricilərin cari təhlilinə, habelə növbəti təqvim ilində maliyyə-təsərrüfat fəaliyyətinə dair proqnozlara əsaslanaraq cari ilin 15 noyabr tarixinədək şöbə üzrə xərclər smetası layihəsini Mühasibat uçotu qrupuna təqdim etmək; 6.26. müvafiq sahədə qəbul olunmuş normativ hüquqi və normativ xarakterli aktların, Maliyyə Monitorinqi Xidmətinin normativ xarakterli aktlarının layihələrinin Maliyyə Monitorinqi Xidmətinin internet saytında yerləşdirilməsində və onların yenilənməsində iştirak etmək; 6.27. Maliyyə Monitorinqi Xidmətinin rəhbərliyi tərəfindən şöbəyə tapşırılmış digər vəzifələri yerinə yetirmək. IV. HÜQUQ VƏ METODOLOGİYA ŞÖBƏSİNİN HÜQUQLARI 7. Hüquq və metodologiya şöbəsi öz vəzifələrini yerinə yetirmək üçün aşağıdakı hüquqlara malikdir:
7.1. müvafiq sahədə dövlət siyasətinin formalaşdırılmasına və bu siyasətin həyata keçirilməsinə dair Maliyyə Monitorinqi Xidmətinin rəhbərliyinə təkliflər vermək; 7.2. Hüquq və metodologiya şöbəsinin funksiyalarının həyata keçirilməsi və işinin səmərəliyini artırmaq məqsədi ilə müvafiq sahədə xarici dövlətlərin səlahiyyətli orqanlarının hüquq xidmətləri ilə əməkdaşlıq etmək, təcrübə mübadiləsi aparmaq, xarici qanunvericilik barədə məlumat mübadiləsində iştirak etmək; 7.3. Maliyyə Monitorinqi Xidmətinin təşkilati strukturu və idarəetmə sisteminin təkmilləşdirilməsi üzrə təkliflərin hazırlanmasında iştirak etmək; 7.4. müvafiq sahədə dövlət proqramlarının hazırlanmasında və icrasında, habelə müvafiq sahənin inkişafına yönəlmiş dövlət və beynəlxalq proqramların həyata keçirilməsində iştirak etmək; 7.5. müvafiq sahədə xarici qanunvericilik üzrə məlumat bazasını Maliyyə Monitorinqi Xidmətinin Beynəlxalq əməkdaşlıq şöbəsi ilə birgə formalaşdırmaq və onun daim yenilənməsi və səmərəli implementasiyası üzrə tədbirlər görmək; 7.6. müvafiq sahədə tədqiqatlar aparmaq, mövcud qanunvericiliklə bağlı metodiki materiallar hazırlamaq və bu materialları nəşr etdirmək; 7.7. hüquq sahəsi üzrə Maliyyə Monitorinqi Xidmətinin aldığı texniki yardım layihələrində iştirak etmək; 7.8. müvafiq sahədə keçirilən konfranslarda, seminarlarda, forumlarda, treninqlərdə və digər tədbirlərdə iştirak etmək; 7.9. Maliyyə Monitorinqi Xidmətinin rəhbərliyinin tapşırığı ilə idarələrarası əlaqələndirmə və məşvərət orqanlarının, işçi qruplarının işində iştirak etmək; 7.10. müstəqil ekspertlərin və mütəxəssislərin öz fəaliyyətinə cəlb edilməsi barədə təkliflər vermək; 7.11. Hüquq və metodologiya şöbəsinin fəaliyyət istiqamətlərinə uyğun olaraq həyata keçirilən işin təkmilləşdirilməsinə dair təkliflər vermək; 7.12. Hüquq və metodologiya şöbəsinin əməkdaşlarının nəzəri biliklərinin və peşə hazırlığının artırılması, habelə onların mükafatlandırılması və vəzifədə irəli çəkilməsi barədə Maliyyə Monitorinqi Xidmətinin rəhbərliyinə təkliflər vermək;
7.13. öz səlahiyyətlərinə aid məsələlərin icrası ilə bağlı Maliyyə Monitorinqi Xidmətinin struktur bölmələrinə müraciət etmək, sorğular vermək və onlardan müvafiq məlumatlar almaq; 7.14. vəzifələrinin icrası ilə əlaqədar digər hüquqları həyata keçirmək. V. HÜQUQ VƏ METODOLOGİYA ŞÖBƏSİNİN FƏALİYYƏTİNİN TƏŞKİLİ 8. Hüquq və metodologiya şöbəsinin strukturu və ştat cədvəli Azərbaycan Respublikasının Mərkəzi Bankının sədri tərəfindən təsdiq edilir. 9. Hüquq və metodologiya şöbəsi işini bu Əsasnaməyə uyğun olaraq, habelə Maliyyə Monitorinqi Xidmətinin iş planları və rəhbərliyin tapşırıqları əsasında həyata keçirir. 10. Hüquq və metodologiya şöbəsinə Maliyyə Monitorinqi Xidmətinin direktoru tərəfindən vəzifəyə təyin olunan və vəzifədən azad olunan Hüquq və metodologiya şöbəsinin rəisi rəhbərlik edir. Hüquq və metodologiya şöbəsinin rəisi və şöbənin əməkdaşları öz fəaliyyətlərini Maliyyə Monitorinqi Xidmətinin direktoru tərəfindən təsdiq olunmuş vəzifə təlimatına əsasən həyata keçirirlər. 11. Hüquq və metodologiya şöbəsinin rəisi şöbəyə həvalə olunmuş vəzifələrin yerinə yetirilməsi və hüquqların həyata keçirilməsi üçün məsuliyyət daşıyır. 12. Hüquq və metodologiya şöbəsinin rəisi olmadıqda onun səlahiyyətlərini Maliyyə Monitorinqi Xidmətinin rəhbərliyi tərəfindən müəyyən edilən şöbənin digər əməkdaşı həyata keçirir. 13. Hüquq və metodologiya şöbəsinin fəaliyyəti barədə Maliyyə Monitorinqi Xidmətinin rəhbərliyinə hər rübün sonuncu ayının 20 dək mütəmadi olaraq rüblük hesabat təqdim edilir.